Aitor Llano Lana, 50 urtekoa, jarri du herrialdeko koordinatzaile karguan. Zuzenbidean lizentziatu zen Deustuko Unibertsitatean, eta aseguruen munduan garatu du bere bizitza profesionala. Bilbon jaioa, Balmasedako bizilaguna eta zinegotzi ohia bada ere, gaur egun Sopuertako Udaleko zinegotzia da eta Bizkaiko Batzar Nagusietako batzarkidea EH Bilduren aldetik.

Llanok Rakel Goñi Lacarren lekua hartuko du, beste ardura batzuk izatera pasa baita, hala nola, Bizkaiko Batzar Nagusietako mahaiko kide izatea eta alderdiak bere agintaldian herrialdearen buruan egindako lana eskertu dio.

Aitor Llano Lana (Iturria: EHB)

Bestalde, Mikel Oraá Diaz de Heredia kazetariarekin bete du batzarrak komunikazio idazkaritzaren hutsunea. 49 urteko gasteiztarra, EHUn Komunikazio Zientzietan lizentziatua, EITB taldean, Onda Cero irratian eta Cadena Ser irratian lan egin du. Komunikazio-bulego korporatiboak ere zuzendu ditu. Gasteizko EH Bilduren udal taldeko komunikazio arduraduna izan da, eta Arabako koalizioko koordinatzailea. Izendapena egin arte, alderdiaren komunikazio saileko langilea bazen.

Mikel Oraá Díaz de Heredia

(Sakatu beheko argazkiaren gainean kanalarekin bat egiteko)

Telegramen ere gaude. Baita X (Twitter), Facebook, Instagram eta Threads-en ere.

Mari Jose Mangado da Nafarroako hiriburuko Eusko Alkartasunaren koordinatzaile berria. Mangadoren hautagaitza atzo Gasteizen egindako Batzar Nazionalean onartu zen. Biltzar Nazionalak onartutako eta indarrean dauden alderdiaren estatutuek adierazten duten moduan, Batzar Nazionalari dagokio hautagai-zerrenda horiek onartzea ala ez. Aurretik gainerako hiriburuetako koordinazioekin egin zen bezala.

Era berean Batzar Nazionalak Berdintasun Batzordeko kideak aukeratu zituen. Jasone Giraldo, Iria Epalza eta Mikel Oribe batzorde hau osatuko dute. Bileran, besteak beste, udal eta foru, eta Nafarroako Parlamentuaren hauteskundeen balantzea egin zen, egungo egoera politikoaren kokapena eta aurreko ekitaldiko kontuak eta egungo aurrekontua onartu ziren.

Lurralde-batzar eratzaile hau Eusko Alkartasunaren Berme Batzordeak otsailaren 6an egindako Nafarroako Lurralde Batzarrean hartutako erabakiak baliogabetu zituelako egin behar izan da. Berme organoak adierazi zuenez, alderdiaren zuzendaritzak salatu zuen bezala, otsaileko batzarrean afiliatu talde batek alderdiaren araudiaren aurka altxatu zen, adin mahaia irregulartasunez osatu zuten, zilegitasunik gabeko batzarreko mahaia adostu zuten eta batzarraren gai zerrenda aldatu zuen.

Nerea Gartzia Nafarroako lurralde koordinatzailea pozik agertu da Lurralde Batzarra estatutuen legezkotasunera itzuli delako, eta estatutuak betetzeko deia egin dio lurraldeko afiliazio osoari. “Funtsezko urrats bat eman dugu, batzarra berriro ere legezkotasunaren barruan, estatutuen barruan, kokatu baitugu. Estatutu horiek dira, hain zuzen ere, gure bizikidetza-arauak, alderdiaren barne-demokrazia bermatzen dutenak”, adierazi du.

Eusko Alkartasunaren estatutuen arabera, “Lurralde Batzarra da alderdiaren jardueraren segimendu politikorako organoa” eta “lurralde-eremu horretako ordezkariena”. Zentzu horretan, Gartziak azpimarratu du lurralde batzarra dela “lurraldeko afiliazio osoak parte hartzeko, bere iritzia emateko eta erabakiak hartzeko lekua, indarrean dauden alderdiaren estatutuek esaten dutena betez”.

Eusko Alkartasunaren Batzar Nazionalak atzo aukeratu zituen Gasteiz, Bilbo eta Donostiako koordinatzaileak, Antxon Belakortu, Galder Agudo eta Mikel Osinalde, hurrenez hurren. Erabakia Eusko Alkartasunak azaroan egin zuen Kongresu Nazionaletik eratorritako Batzar Nazional berria eratzeko bilkuran hartu zen.

Kongresuan bertan gehiengo osoz onartutako estatutuek argi eta garbi diote hiriburuetako koordinatzaileen izendapenak Batzar Nazionalaren eskumena direla. Halaber, ezarritako epearen barruan hiriburuetako edozein afiliatuk aipatutako karguetara bere burua aurkezteko aukera izan du.

Antxon Belakortu, 1969an jaioa, Gasteizko koordinatzaile berria da. Bere ibilbide politikoan nabarmentzen da Miñano Goienako alkate eta Gasteizko Udaleko zinegotzi izatea (2001-2019). Bestalde, elektronikan espezialista gisa eta erosketa-zentraleko merkatari eta kudeatzaile gisa egin du lan.

Galder Agudo aukeratu dute Bilboko koordinatzaile. 1999ean jaio zen Bizkaiko hiriburuan eta Ingeniaritza zibileko ikaslea da. Bere ibilbide politikoan Gazte Abertzaleko Bizkaiko koordinakundearen ardura nabarmentzen da.

Donostiako koordinatzaile berria, Mikel Osinalde, 1989an jaioa, Gazte Abertzaleko komunikazio-idazkaria izan zen 2015 eta 2019 artean. Arkitektura Gradua du eta Diseinu Grafikoko ikaslea da. Ostalaritzaren sektorean egin du lan eta gaur egun Gipuzkoako Antolakuntzaren arduraduna da.