Itsas Gudari Eguna, Alkartasuna Fundazioarekin batera urtero Gerra Zibilean Euzkadiko Gudontzidiko gudariak omentzeko antolatzen dugun deialdia, gaur ospatu dugu Bermeon. Hitzorduak bi ekitaldi izan ditu aurten ere. Lehena, Nestor Basterretxearen Matxitxakoko Guda eskulturan, Naiara Fernandez Madariaga Eusko Legebiltzarreko legebiltzarkideak aurkeztuta. Eba Blanco de Angulo, idazkari nagusiak, eta Imanol Urrutia Barriketak, ikurrina igo eta lore-eskaintza egin diete lurmuturreko uretan demokrazia frankismoaren aurrean defendatu zuten gudari ausartei.

Hedabideei egindako adierazpenetan, Blancok Espainiako Estatuak diktaduran zein trantsizioan izan zuen papera izan du hizpide. Duela hogeita bost urte Alemaniak Gernikako bonbardaketan izan zuen ardura historikoa bere gain hartu zuela gogoratu du. “Noiz aitortuko du Espainiako Estatuak frankismoak Euskal Herrian eragindako triskantzetan izan duen ardura? Ia berrogeita hamar urte daramatzagu itxaroten”, gogoratu du. “Egia da biktima batzuk aitortu dituztela, Martxoaren 3an Gasteizen izandako sarraskiaren kasuan bezala, hain zuzen ere, astearte honetan bere berrogeita hamargarren urteurrenean gogoratuko duguna, baina Espainiako Estatuak, guztiaren gakoa aitortu gabe jarraitzen du: hau da, bere erantzukizun politikoa” gaineratu du alderdiaren buruak.

Joan den asteazkenean kolpearen dokumentazio ofiziala desklasifikatzearen harira, O23a ere aipatu du. ““Otsailaren 23koen ondoren, Estatuak Euskal Herrian eskubide urraketen inguruko dokumentuak desklasifikatu behar ditu, hala nola, Martxoaren 3koak Gasteizen, 78ko Sanferminak, Zabalza kasua eta GALekin lotutakoak”, esan du. Blancoren hitzetan, “Estatuak guztiz demokratikoa izan behar du, eta ez demokrazia salbatzearen ordez, 78ko erregimena indartzeko estatu kolpea eman zuen estatu sakona. Benetan hala bada, Sekretu Ofizialen Legea indargabetu behar du”.

Bigarren ekitaldian, Bermeoko Kafe Antzokian, Meritxell Elgezabal Intxaurragak aurkeztuta, Pello Otxandiano Kanpo, EH Bilduren Eusko Legebiltzarreko bozeramailea, Idurre Bideguren Gabantxo senataria, eta Edriga Aranburu Agirre, Bizkaiko batzarkidea, solasaldian aritu dira. Burujabetzan aurrera egitea ahalbidetuko duen estatus politiko berri baten beharraz, Euskal Errepublika lortzeko helburuarekin. Eskubide historiko eta demokratikoak, justizia soziala, eredu ekonomikoa, finantzarioa eta fiskala, jorratu dituzte, baita herri erronkei aurre egiteko beharrezkoak diren eraldaketak zerrendatu ere.

Itsas Gudari Eguna, hots, Gerra Zibilean Euskadiko Gudontzidiko gudariak omentzeko ekitaldia, martxoaren 1ean, igandean, antolatu dugu Bermeon Alkartasuna fundazioarekin batera.

Hitzorduak bi ekitaldi izango ditu aurten ere. Lehena, Nestor Basterretxearen Matxitxakoko Guda eskulturan Naiara Fernandez Madariaga, Eusko Legebiltzarkideak aurkeztuta. Eba Blanco de Angulo, idazkari nagusiak, eta Imanol Urrutia Barriketak ikurrina altxatuko dute, eta lore-eskaintza egingo diete lurmuturreko uretan frankismoaren armadaren aurrean Euskadi defendatu zuten gizon ausartei. “Badira hogeita bost urte Alemaniak Gernikako bonbardaketan bere erantzukizun historikoa bere gain hartu zuela. Noiz aitortuko ditu Espainiak frankismoak Euskal Herrian eragindako kalte izugarriak? Ia berrogeita hamar urte daramatzagu halakorik gertatu gabe, baina guk, urtez urte, kolpismo faxistaren aurrean gure herria defendatzeagatik bizia eman zuten gudariak omentzen jarraitzen dugu”, adierazi du Blancok.

Matxitxakoko ekitaldia amaituta, Itsas Gudari Egunak Bermeoko Kafe Antzokian jarraituko du, eta bertan Meritxell Elgezabalek aurkeztuta, Pello Otxandiano Kanpo, EH Bilduren Eusko Legebiltzarreko bozeramailea, Idurre Bideguren Gabantxo senataria, eta Edriga Aranburu Agirre, Bizkaiko batzarkidea, solasaldian arituko dira. Euskal Errepublika lortzeko helburuarekin, burujabetzan aurrera egitea ahalbidetuko duen estatus politiko berri baten beharraz hain zuzen ere. Eskubide historiko eta demokratikoetatik hasi, justizia sozialetik pasa, eta eredu ekonomiko, finantzario eta fiskaleraino. Euskal Herriaren erronkei aurre egitea ahalbidetuko duten beharrezko eraldaketak jorratuko dituzte ere.

Arabako Probintzia Auzitegiko 1. sekzioak auto bat igorri du Maiorga Ramirezen alegazioa ezesteko (Gasteizko lehen instantziako 7. epaitegiaren aurreko autoari, non primarioen eskaera artxibatzen zen) eta, beraz, arrazoia eman dio Eusko Alkartasunari. Alderdiak ez du hauteskunde primarioetarako deialdirik egin beharko, bide arruntetik ezin baita inolako errekurtsorik aurkeztu. Beraz, Eba Blanco de Angulo idazkari nagusia buru duen Eusko Alkartasunako zuzendaritzak, barne demokrazia eta legea betez jardun du.

Probintzia-auzitegiko hiru epailek emandako autoaren oinarri juridikoak ahobatezkoak eta erabat irmoak dira, argitzen baitute 2022ko otsaileko eta azaroko ohiko eta ezohiko kongresuetan –horiek ere berme demokratiko guztiekin egin ziren, epai irmo banatan jasotzen den bezala, non ez dagoen primariorik– alderdiaren estatutuak onartuz, nazio zuzendaritzak zorrotz bete duela legezkotasuna. Auzitegiak gaineratzen du: “ezin dugu bat egin apelatzaileak erabiltzen dituen argudioekin, ez epaian agindutakoa ez betetzeari, ez eta ustez eragin omen zaizkion kalteak ordaintzeko eskatzen duen ordezko kalte-ordainari dagokionez ere, kalte horiek ere ez ditugu inondik inora ikusten”. Eta ondorio hau ateratzen du: “epaian xedatutakoa bete da, eta, beraz, bete-betean bete da betearazlearen eskaera”.

Eba Blanco de Angulo idazkari nagusiak prentsaurrekoan eman du autoaren balorazioa egiteko. “Sei urte baino gehiago daramatzagu Maiorga Ramirezen sektorearen salaketa zibil eta penalei, erasoei, jazarpenari eta irain publiko eta pribatuei aurre egiten. Delitu oso larriak leporatu dizkigute eta behin eta berriz, epaitegiek arrazoia eman digute. Azken auto honekin, justiziak behin betiko berresten du urte hauetan guztietan, beti bete dugula alderdiaren barne demokrazia eta legea”. Agintariak ardurak haratago zabaldu ditu. “Denbora honetan, hedabide batzuek, Eusko Alkartasuna eta EH Bildu higatzeko asmoz, Ramirezen sektorearen alde egin dute, kazetaritzaren arau deontologikorik funtsezkoena bete gabe, hau da, gertakarien beste bertsioa eskatu gabe”.

Blancoren ustez, auzia ez zen inoiz epaitegietara eraman behar. “Afiliatu guztien eskubideak bermatzen dituzten barne organoak ditugu, baina botoa emanez irabazi ezin izan duena epaitegietan irabazten saiatu da Ramirez denbora tarte oso honetan”. Azaldu duenez, “Eusko Alkartasunari eta bere oinarri soziala osatzen dugun pertsona askori eragin dioten kaltea eta paralisia izugarria eta zenbatezina da. Sei urte baino gehiago eman ditugu energia eta baliabideak alderdia eta afiliatu guztien eskubideak defendatzeko. Ramirezen sektorea inoiz hasi behar ez zuen auzi judizialetan denbora galarazteaz arduratu da, horrela alderdiari ekintza politikoan aritzea galaraziz”. Eta jarraian galdetu du: “Epaitegiek gauza guztietan arrazoia eman digutenez, Maiorga Ramirezen sektoreko norbaitek barkamena eskatuko du? Ramirezen alde egin zuten hedabideek, hanka sartu zutela aitortuko dute?”.

Gainera, idazkari nagusiak iragarri du ez duela karguan jarraituko aurten egin behar den ohiko kongresutik aurrera. “Pozik noa jakitearekin akatsak egin ditugun arren, funtsean, gauzak ondo egin ditugula, eta alderdia zama askotatik libre uzten dugula, baita alde judizialetatik ere. Eusko Alkartasuna momentu gozoan dago eta pozten naiz etorkizuneko zuzendaritzak horretaz baliatu ahal izateaz gure altxorrik handienari, gure afiliazio eta printzipioei, etekin handiena ateratzeko”. Ondorengotzari dagokionez, “zuzentzen dudan nazio zuzendaritzaren azken erantzukizuna oinordetza lasaia erraztea dela, Eusko Alkartasunaren balore politiko eta humanoen garapena bermatuko duena. Izan ere, Alkartasuna elkartasuna da, eta balio horiekiko guztiekiko leialtasuna ere izan behar du”. itxi du Blancok.

Zaintza behar duten beste pertsona batzuez arduratzeak, zuzenean edo zeharka eragiten digu biztanleriaren zati handi bati. Gainera, lehenago edo beranduago, ia herritar guztiok beharko dugun zerbitzua da. Hala ere, pribatizazioa eta prekarietatea zainketen kalitatea arriskuan jartzen duen mehatxu bikoitza da. Beraz, gaur egun, zaintza sistema publikoa eraikitzen, edo suntsitzen ari gara?

Alkartasuna eta Coppieters fundazioetatik urtarrilaren 24an, larunbata, Bilboko EHUko Bizkaia Aretoko Baroja auditorioan antolatutako Zaintzen Zain- Who Cares jardunaldiak funtsezko galdera horri erantzuten saiatuko gara. Horretarako, doako jarduera bat programatu dugu, aldibereko itzulpenarekin, eta gaian interesa duen edonorentzat irekia. Europako adituak eta Euskal Herriko eragile sozial eta laboralak, beren ikuspuntuak justizia sozialeko politiketatik jorratuko dituzte, pertsonak zainketen erdigunean jarriz, eta beti ere ikuspegi feminista batetik.

Zaintzen Zain-Who Caresen programa 10:00etatik 13:30era garatuko da, eta honako hauek parte hartuko dute: Kathleen Lynch doktorea, Irlandako Gobernuko Giza Eskubideetarako eta Berdintasunerako komisarioa; Nena Georgantzi, Galwayko (Irlanda) Unibertsitateko doktorea; Tine Rostgaard, Danimarkako Roskilde Unibertsitateko Gizarte eta Enpresa Zientzien Saileko irakaslea, eta Dana-Carmen Bachman, Europako Batzordeko Eskubide Sozialen eta Inklusioaren Unitateko burua. Halaber, Euskal Herritik, Ane Izagirre soziologia eta gizarte langintzako ikertzailea, eta Parte Hartuz ikerketa taldeko kidea izango da bertan, Denon Bizitzak Erdigunean plataformako, Maitelan herritarren kooperatibako, Arrasateko Udaleko eta ZainSareko ordezkariekin batera.

XXI. mendeak oso bestelako etorkizuna izan beharko luke: diplomazia, elkarrizketa eta elkarrekiko errespetua, herri guztien arteko elkarbizitza baketsuaren berme gisa. Hala ere, beste behin ere, potentzia handiek alde batetik potentzial ekonomiko handia duten lurraldeen gainean dituzten interes ekonomikoek eta, bestetik, migrazio-tentsioak, eta askotariko eragin ideologikoak baretzeko komenientzia geopolitikoak, beste herri bat, Saharahuia, berriz ere isilarazi eta giltzapetzera daramate, Estatu subirano gisa existitzeko eskubidea ukatuz.

Nazio Batuen Segurtasun Kontseiluaren azken erabakiak zuzenean egiten du talka bere Batzar Orokorrak berak onartutako ebazpenetatik eratorritako ibilbide eta jurisprudentzia guztiarekin. Halaber, ez da harritzekoa jakitea bost kide iraunkorretatik hiruk (Frantzia, Ingalaterra eta Estatu Batuak) onartu egin zutela Espainiako gobernuak 2022an hartutako erabaki zentzugabea, Marokok aldebakarrez proposatutako Sahararako autonomia-planaren alde eginez, Saharahui herriaren ordezkari legitimoa den Fronte Polisarioari kontsultatu gabe. Plan hau, sortu den moduagatik hilda jaio da, eta mamia, Marokok Saharahui herriari ezarritako basailutza instituzionalizatuaren proposamena besterik ez baita.

Auzia ezin da ondo amaitu, ez baitaki abandonatu eta basamortuan aparkatu herri oso baten errealitatea zein den. Ez ditu aintzat hartzen nazioarteko zuzenbidea errespetatzea eskatzeagatik preso dauden gizon eta emakume guztiak, eta begiak ixten ditu torturatuen, desagertutako pertsonen eta hildakoen kopuruaren aurrean.

Honelako erabakiek herri oso baten itxaropena txikitzen dute, baina, bereziki, Saharako belaunaldi gazteena. Bereziki gazteak, ezin ditugu beren kasa utzi.

Inoiz ez da berandu hausnartzeko.

NBEko Batzar Nagusiak, Afrikako Batasunak, Europar Batasunak eta gure nazioetako gizarte zibilak ezin dute beste alde batera begiratu. Batasuna, ekintza eta itxaropena, baldin eta oraindik uste badugu politika gutxi batzuen interesetatik harago doala.

Sahara Hurra!

Lorena Lopez de Lacalle Arizti

Nazioarteko Politikako idazkaria

Hala ere, akordioko argazkian munduko hogei bat buruzagi agertzea, ezin da argazki populista eta hipokrita izan.

Israelek 30.000 palestinar baino gehiago hil ditu, borrokalariak ez diren gizonak, emakumeak eta adingabeak barne, eta buruzagi horietako askok ez zuten uste Israel genozidioa egiten ari zenik. Adibiderik nabarmenena Georgia Meloni Italiako Ministroen Kontseiluko lehendakariarena da, sarraskia gertatu eta bi urtera, terminoa saihesten jarraitzen baitu.

Ezin da izan 68.0000 pertsona baino gehiago akabatu dituen genozidio bat burutu edo baimendu dutenak, salbatzaile gisa agertzea gero argazkian, eta hori pairatu duenak berriz, herri palestinarra hain zuzen ere, erabat suntsitutako lur batera eta etorkizun oso zalantzagarriarekin itzultzen diren galtzaileak izatea.

Negoziatzaileen artean Euskal Herriko eta Irlandako bake prozesuan bitartekari izan zen Jonathan Powellen mailako pertsonak badaude ere, tamalez Egiptoko bake akordioak ez du palestinarren auzia konpontzen. Netanyahurekin bakea ezinezkoa izango da, eta ikusteko dago Israelgo herritarrek zer bozkatzen duten bi urte luze hauen ondoren. Hala eta guztiz ere, espero dugu, akordioa sinatzen den momentutik aurrera, bide sendo bat hastea, hau bezalako gatazka korapilatsu askatzen joateko eta hortaz, behin betiko bakean amaituko dena.

Eba Blanco de Angulo Eusko Alkartasunako idazkari nagusiak Irailaren 21ean Laguardian Gure Nortasuna lelopean ospatutako Alkartasun Egunean, hau da, gure alderdiaren jaian, egindako adierazpenen gai nagusia estatus politiko berria izan da.

Blancok estatus politiko berriaren egutegia aurreratzeko eskatu dio zuzenean lehendakariari. “Ostegunean Politika Orokorreko Osoko Bilkuran proposatu zuen estatus politiko berriaren egutegia berandu doa. Ezin dugu 2026ko ekainean alderdien balantzekin egon. Hauteskundeak aurreratu gabe, 2027 da gure epemuga. 2027tik aurrera ezinezkoa izango da eta beste aukera leiho historiko bat galduko genuke”, ohartarazi du. 2026ko ekainerako mahai gainean egon behar du gutxieneko akordio bat alderdi demokratikoen artean, estatus politiko berri baterako. “Lehendakariak EAEko arduradun politiko nagusi gisa gidatu behar duen prozesua denez, lidergoa eskatzen diogu estatus berriaren bide-orria aurreratzeko. Bide honetan aurrera egiteko gure baldintzarik gabeko kolaborazio osoa du”.

Idazkari nagusiak euskal agendaren erdigunean kokatu du estatus berria, egungo marko politikoa atzean utzita. Gernikako Estatutuaren eskumenak erabat betetzea eskatu du, Estatuak 46 urte bete ez dituelako. “Baina, hain zuzen ere, bete gabeko 46 urte horiengatik, Gernikako Estatutuak jada ez du balio euskal herritarron eskaera sozial eta politikoak asetzeko. Herri hau asko aldatu da 1979az geroztik, eta Estatuarekiko egungo harreman ereduak, porrot egindako sistema, ez dituelako batez ere gure eguneroko arazoak konpontzen, etxebizitza duin baterako sarbide unibertsala, adibidez. Hortaz ez digu ezertarako balio. Gainera, Ayuso eta Abascalen eskuin muturrak Espainia gobernatzeko aukera errealak ditu eta gure autogobernua arriskuan dago”. Blancoren hitzetan, “Estatuak plurinazionaltasuna onartzeko unea da. Euskal Herria bezalako estaturik gabeko nazioak, Eskuin muturraren aurrean euste harresirik onena gara”.

Galder Agudo Bezi Gazte Abertzaleakeko idazkari nagusiak gazteriaren arazoetara eraman du arreta. “Euskal Herriko gazteriak arazo larriak ditugu, hala nola, etxebizitza duina eskuratzea, lan prekarietatea eta osasun mentala, eta horiek kronifikatu egin dira, gobernatzen gaituzten alderdiak ez direlako gai guri konponbideak emateko”, adierazi du bere diskurtsoan. Agudoren hitzetan, estatus politiko berri bat ezinbestekoa da, “subiranotasuna Madriletik eta Parisetik pasa behar izan gabe Bidasoaren bi aldeetan langileok lan eskubide berdinak izatea erabaki ahal izatea da. Subiranotasuna gure eguneroko bizitzaren kostura egokituko den lanbide arteko gutxieneko soldata bat hemendik ezarri ahal izatea da. Burujabetza ongizatea da, eta Espainiako eta Frantziako estatuen menpe gauden bitartean ez da modurik izango euskal herritar guztiontzat bizitza duin eta justu bat bermatzeko”.

Alkartasun Egunaren ekitaldi nagusia Arabako Errioxan pertsona erreferentzialekin egindako solasaldia izan da. Berrogei minutuz aritu dira hizketan mahastizaintza eta ardogintza sektoreaz eta olioaz, eskualdeko zerbitzu publikoen egoeraz, hezkuntza eskaintzaz eta euskararen presentziaz, kulturaz eta inguruko euskal nortasunaren ezaugarriez. Mahai-ingurua bukatuta, eskualdeko abertzaleen nortasuna eta balioak ordezkatzen dituzten bi pertsona omendu dituzte. Hain zuen ere Teodoro Martinez de Cañas, 1977ko uztailaren 25ean ikurrina lehen aldiz altxatu zuen Lezako alkatea eta Loli Sarasua Ruiz de Gallo, Lezako alkatea ere bi legegintzalditan eta B ereduaren aitzindarietako bat Laguardian. Kultur jarduera gisa, Zintzo upategira bisita gidatua ere antolatu dute. Alderdiaren egunean ohiko herri bazkaria ere izan da. Gainera, EH Bildu, ERC, Compromis, Mes per Mallorca, Mes per Menorca eta Estau Aragoneseko ordezkaritzak Laguardian izan dira.

Eba Blanco de Angulo idazkari nagusiak EAErako eta Nafarroarako estatus politiko berri bat “lehenbailehen” adosteko beharra azpimarratu du. Alderdia sortu zela 39 urte gaur bete direla eta, 1986ko irailaren 4an hain zuzen ere, alderdiko agintari gorenak beste behin ohartarazi du Euskal Herriarentzat mehatxu atzerakoia dela ultraeskuinaren agenda politikoa ezartzea. “Madrilgo gobernuak Estatua plurinazionala dela eta, beraz, nazio bat garela politikoki onartzea ultraeskuinaren aurkako euste-hormarik eraginkorrena da. Hauteskundeetako emaitzek erakusten duten bezala, hemen ultraeskuinaren pozoia ez da hainbeste sartzen. Komunitate gisa kohesionatuago egotea eragiten duten beste balio batzuk ditugulako gertatzen da hori, baina kontuz, aurrera egin behar dugu, denbora gure kontra baitoa”.

Blancok onartu du PSOEren azken ustelkeria kasuak beste oztopo bat direla esparru politiko berri baterako bide korapilatsuan, “baina Kataluniak frogatu zuen aldebakarreko bidea ez zela bideragarria” eta, beraz, Pedro Sanchezen alderdiarekin negoziatzea baino ez dagoela. “Berez, La Moncloatik lortu gabe dauden transferentziak jasotzea, hala nola, gizarte segurantza, langabeziagatiko prestazioa, eta aireportuen kudeaketa ondo dago, Estatuak 46 urte baitaramatza Gernikako Estatutua urratzen. Kontua da oso berandu eta gaizki iristen dela. Espainiako Estatua nabarmen porrot egin duen egituraketa politikoa da, eta ez ditu inondik inora euskal herritar gehienon espektatiba politiko eta sozialak betetzen”, azaldu du. “Hala, herri honetako indar demokratiko guztiei dei egiten diegu 2026ra arte geratzen diren lau hilabete hauetan, estatus berri baterantz aurrera egitea ahalbidetuko digun minimoen akordio bat bila dezagun”.

Euskal nazionalismoak XXI. mendean izan duen indarrari buruz, Blancok mezu argia zabaldu du: “guretzat abertzale izatea ez da ideal erromantiko bat. Abertzale gara bidegabekeria politiko eta sozialak abolitzeko. Euskal nazionalismoaren kasuan, 2025ean, abertzaletasuna eta demokrazia eta giza eskubideen errespetua gauza bera dira, eta ez dugu ulertzen batzuek gauza bat besteari baino lehentasun handiagoa ematea. Gu beti egongo gara historiaren alde zuzenean, adibidez atzo Bilboko kaleetan gertatu zen bezala, La Vuelta pasatzerakoan Palestinako herriaren genozidioa munduaren aurrean ozen salatuz”.

Memoria demokratikoari buruz, zera esan du: “Lauaxeta fusilatu zuen ideologia Txiki eta Otaegi fusilatu zituen bera da. Gaur egun nazio gisa ditugun eskubideak ukatzen jarraitzen duen ideologia bera. Are gehiago, batzuen eta besteen arteko konparazioak egiten dituztenek, ederki dakite ideologia hori indar handia hartzen ari dela. Abertzaleen artean, gaiaren erroan adostasuna egon beharko litzateke gure historiaren puntu honetan”, adierazi du idazkari nagusiak.

Era berean, herritarren segurtasuna ikuspegi demokratiko orokor batetik hartu du hizpide Blancok. “Arduragabekeria ikaragarria da delinkuentzia eta immigrazioa lotzea, ultraeskuinaren marko maltzur eta piromanoan erortzea baitakar. Hala ere, horrek ez du esan nahi herritarren segurtasunaren eztabaida baztertu behar denik, polizia-eredua barne, argi baitago herritarren zerbitzura dagoen gertuko polizia batetik desbideratuta dagoela”.

1. Munduaren begien aurrean egindako herri palestinarraren genozidioaren salaketa argi eta borobila.

2. Estatuei eta agintari publikoei Israelgo Estatuarekin harremanak hausteko eskatzea.

3. Israelgo Estatuari zuzendutako armamentuaren eta teknologia dualaren bahitura osoa.

4. Europar Batasuna-Israel elkartze akordioaren etena.

5. Gazako biztanleei elikagaiak berehala ematea.

6. Estatu palestinarraren aitortza

7. Bide diplomatikoa, gerraren amaierarako baliabide bakarra.

8. Errefuxiatuen itzulerarako funtsak askatzea eta Estatu Palestinar subirano aske eta baketsua berreraikitzea.

EAtik, beste behin, dei egiten dugu zaharkituta utzi duten euskararen legea gainditzeko eta beste hizkuntza lege bat eraikitzeko, euskaldun giza ditugun eskubideak errespeta daitezen. Bestaldetik, Espainiako Gorenak bide eman dio Nafarroako PAIk dakarren eskaerari: irakasleen kidego paralelo bat sortzea ingelesaren derrigorrezko eskakizunarekin. “Hau da, Europako beste inon gertatzen ez dena Nafarroan gertatuko da, Nafarroa izango baita, irakasle-jeneralista hizkuntz atzerritar bat jakitea ezinbesteko baldintza ezartzen duen lurralde bakarra”, salatu du Asenjok. Gogora dezagun PAI programa UPNk sortu zuela helburu argi batekin: euskarazko irakaskuntzaren zabalpena moztea.

Egoera honen aurrean, EAtik bat egiten dugu larunbat honetan, hilak 19, UEMAk deitu duen udaletxeen aurreko elkarretaratzeekin, eguerdiko 12etan. Era berean, bat egiten dugu ere EHE mugimenduak “Lehentasunez euskaraz orain!” lemapean igande honetarako, hilak 20, goizeko 11tan, Baionan, Maulen eta Donapaleun deitu duen elkarretaratzeekin.