Alderdiko ehun afiliatu baino gehiagok, Nazio Zuzendaritzako eta Kontseilu Nazionaleko kideekin batera, Alkartasun Egunean parte hartu dute gaur Zornotzan, alderdiak urtero egiten duen hitzorduan. EAk afiliazioarekin izandako topaketa, ‘Ekin etorkizunari’ lelopean, Nestor Basterretxea omentzeko aprobetxatu dugu. Hots, 2014an hil zen euskal artistarik unibertsalenetako bat eta alderdiko kidea.

Zornotzako Zubiondo parkean egindako ekitaldi politikoan, Eba Blanco idazkari nagusiak nabarmendu du “zume demokratiko nahikoak” daudela “estatus berri bati buruz hitz egiteko, Estatuarekiko harreman eredu berri bati buruz aritzeko, non euskal gizarteak bere etorkizuna libre eta demokratikoki erabakitzeko duen eskubidea aitortuko den”.

EAko buruzagiak azpimarratu duenez, estatus berria “beharrezkoa da, Gernikako Estatutua bete ez den 45 urteko esperientziaren ondoren”. Izan ere, eskumenak “Madrilek nahi izan duenean edo gobernua premia-egoeran egon denean bakarrik transferitu dira, baina ez hitzartutakoa betetzeko borondate politikoa zutelako”.

Blancok adierazi duenez, estatus berriak “Estatuarekiko harreman eredu berri bat izan behar du, non bermeak egon behar diren hitzartutakoa betetzeko eta euskal gizartearen borondatea errespetatzeko”.

Hala ere, zalantzak agertu ditu EAJk Gasteizko ganberan erabakitzeko eskubidea defendatzeko duen borondatearen inguruan. Jeltzaleak “bi uren artean” eta “eskuak eta oinak lotuta” daudela adierazi du, PSOErekin dituzten gobernu itunen ondorioz. “Argitu eta frogatu behar dute, unean uneko adierazpenetatik harago, erabakitzeko eskubidea aurrera eramateko prest dauden edo eskumenen inguruko eztabaida hutsa izatea nahi duten”, nabarmendu du Blancok.

Halaber, erabakitzeko eskubideak euskal gizartearen artean babes zabala duela esan du EAko idazkari nagusiak. “Inkesta ugarik beti nabarmendu dute. Azkena aste honetan aurkeztutako Naziometroak. Bertan berresten da euskal gizartean badagoela gehiengo esanguratsu bat, hain zuzen ere, %60tik gorakoa, erabakitzeko eskubidea babesten duena”, gehitu du.

Horren harira, Blancok gogorarazi du “adostasun handiak desiragarriak” direla, baina ezin direla baldintza sine qua non bihurtu akordioak lortzeko, orduan “posizio minoritarioei beto eskubidea ematen ariko ginatekeelako”. “Hori guztiok argi izan behar dugu, bereziki PSEk eta Andueza jaunak, askotan ahazten baitute gutxiengoan daudela”, gaineratu du.

Nestor Basterretxea

Alderdiak gaurko eguna aprobetxatu du ere Nestor Basterretxea omentzeko. Azken hilabeteotan hainbat erakundek egin duten bezala; izan ere, Basterretxea euskal artistarik unibertsalenetako bat da, eta alderdiko afiliatua 2014an zendu zen arte.

Eba Blancok nabarmendu du Basterretxeak artea mundua eraldatzeko tresna gisa ulertzen zuela eta bere artea azpimarratu du “nazio minorizatu eta Estaturik gabeko gisa erreferente propioak izateko dugun beharra”.

Gorka Basterretxea semeak ordezkatu du artistaren familia, eta pieza paregabe bat eman diogu, 1987ko, aitak Eusko Alkartasunaren kongresu eratzailerako diseinatu zuen orrian oinarrituta, zeinari bere lanen beste elementu adierazgarri batzuk gehitu zaizkion, hala nola forma diskoidalak.

Alkartasun Eguna ospatuko dugu irailaren 22an, igandea, Zornotzan (Bizkaia), alderdiaren komunitatearen urteroko topaketa-festa. Edizio honetan, Ekin etorkizunari lelopean, Nestor Basterretxea artista bermeotarra omenduko dugu bere jaiotzaren mendeurrenean.

Hitzordua Basterretxearen inguruan izango da, “ziurrenik historian eragin handiena izan duen euskal artista multidiziplinarraren inguruan”, eta artistari egin nahi izan diogunn lehen omenaldia Alkartasun Eguna iragartzeko kartelean bertan izan da, bere obran inspiratutako kartelean.

Ilustrazioaren oinarria Basterretxeak 1987an EAren kongresu eratzailerako diseinatutako haritz-orria da, eta disko-formak ditu, bere lanaren elementu adierazgarrienetako bat, logotipoetan, proiektu arkitektonikoetan, obra grafikoan eta eskulturan erabilia, non artistak bi dimentsioetatik hiru dimentsioetara egiten zuen jauzia.

2024ko Alkartasun Eguneko ekitaldi politikoan, Nestor Basterretxea omenduko dugu berriro, eta haren obran oinarritutako oroigarri bat emango diogu artistaren familiari.

“Néstor Basterretxearen jaiotzaren mendeurrenean, miresmena eta esker ona adierazi nahi izan diogu aparteko gizaki bati. Artista paregabea eta hilezkorra, eta baita militante leiala eta Euskal Herriarekin ere konprometitua”, azpimarratu du Eba Blanco idazkari nagusiak.

Era berean, Blancok adierazi duenez, “berezko sinboloak eta erreferente kulturalak, hala nola Basterretxea, berebiziko garrantzia dute nazio-nortasuna eta nazio-kontzientzia indartzeko, markoa Euskal Herrian kokatzeko”.

Donostiako Udalaren legegintzaldiko lehen urtearen balantzea egin dugu gaur, eta hiriaren arazoen aurrean EAJren eta PSEren udal gobernuaren ekintza eza salatu dugu. Gobernu taldearen politikek hirian dagoen bizitegi arazoa areagotu dute eta Donostian gero eta auto gehiago daude.

Eneko Goiaren udal gobernuaren kudeaketaren eta jarduteko moduen balorazio negatiboa egin dugu. Donostiako Udala ekimen pribatuen izapidegile hutsa bihurtu da, ekimen horien kontura geratu da eta udal sustatzaile gisa izan behar duen papera baztertu du.

Lehen urte honetan, Eneko Goiak eta udal gobernuak ez dituzte kontuan hartu hiriaren eta herritarren beharrak, eta ez dute iniziatiba propiorik hartu hiriaren arazo larriak konpontzeko, elkarteen eta taldeen aldarrikapenei entzungor eginez. Politika neoliberalek eta udal-ekimen ezak areagotu egin dute hiriak duen bizitoki-arazoa.

Azken 8 urteotan ez dute ia etxebizitzarik eraiki, sustatzaile pribatuek garatzen dituzten etxebizitza “esklusiboak” aintzat hartzen ez baditugu; aitzitik, eraikitzen denean, legeak eskatzen duen gutxieneko etxebizitza babestua baino ez da egiten. Halaber, legea desitxuratzen dute, dagoeneko masifikatuta dauden eta berdegunerik ez duten auzoak etxebizitzaz masifikatzeko eta berdegune horiek beste auzo batzuetan eraikitzen dituzte, dagokion hirigintza-garapenetik kilometrotara; adibidez, Martuteneko gasolindegi zaharrean etxebizitzak egitea eta berdeguneak Puiora eramatea, Zardoya Otisen lurretan etxebizitzak eraikitzea eta berdeguneak Igeldora eramatea.

Bestetik, positibotzat jo dugu Errenteria tentsioz handiko eremu izendatu izana, eta uste dugu Donostia ezin dela atzean geratu.

Loiolako kuartelak

Loiolako kuartelen inguruko azken berriak hizpide izanda, hirigintza operazioa lardaskeria bat izan dela uste dugu. Loiolako kuartelen erosketa azkar, garesti eta gaizki sinatu da, hauteskunde garaietan saldu zitekeen argazkiaren bila eta orain badakigu, Kostaldeen Legearen arabera, agian ezingo dela Urumeatik lehenengo 100 metroetan eraiki.

Gainera, militarrentzako 58 etxebizitza babestu eta 50 garaje erreserbatu izana lotsagarria da.

Turistifikazioa

Hiriaren masifikazioari eta turistifikazioari dagokionez, Donostia beti izan da hiri turistikoa, irekia eta atsegina, baina alkate honek masifikazioaren eta ekimen pribatuaren aldeko apustua baino ez du egiten, herritarren ongizatearen kontura. Horren adibide garbia da Grosen GOe eraikitzeko intsistentzia; izan ere, auzoa berez oso tentsionatuta dago, eta hainbat urte daramatza biztanleak etengabe galtzen.

Zentzu horretan, udal gobernuak hotel-lizentzia gehiago emateko luzamendua onartzen du, baina salbuespenak salbuespen eta gogoz kontra, eta soilik unean uneko hauteskunde-egoeragatik. Badirudi batzuek interes handiagoa dutela pintxoaren Disneylandean bihurtzeko, tokiko merkataritza sustatzeko baino.

Mugikortasuna

Mugikortasun ereduaren inguruan, EAJren ausardia falta, baina batez ere PSErena kritikatu nahi dugu. Gure hiria geroz eta auto gehiagoz kolapsatuta dago, baina badirudi udal gobernu honek interes handiagoa duela RACVN edo eraikuntza enpresak pozik uzteko. Txandakako aparkaleku berri bat eraiki nahi dute San Bartolomen, deskafeinatutako EGE bat ezarri nahi dute zentroan eta Marrutxipiko bizilagunei auto-ilarak eta zaratak besterik ez diete eskaintzen.

Legegintzaldiaren lehen urtearen balantzearekin Udalean dagoen entxufismo politiko maila jasanezina dela baieztatu dugu. La Esperantzako frontoi zaharra zegoen orubean eraikitako ekipamendu berrian jarri nahi dugu arreta. Ekipamenduaren kudeaketa pribatizatu da, eta 302.300,77 euroan esleitu zen otsailean EAJren pantaila-elkarte bati, Hazian Kultur Elkarteari hain zuzen ere. Elkarte horrek Sabino Arana Fundazioarekin eta EAJren beste satelite-elkarte batzuekin partekatzen du egoitza

Ekipamendu hori ez zen pribatizatu behar, zerbitzua udaleko langileek eman behar zuten eta espazio hori koordinatzeko entxufismo politikora jo dute berriro ekipamenduaren buruan Maialen Olabe jarri dutenean. Maialen Olabe Plentziako EAJko kidea da, eta Eusko Legebiltzarrerako azken hauteskundeetan Imanol Pradales buru zuen hauteskunde-zerrendako 16. postua bete zuen.

Horri gehitu behar zaio berriki EGIko militantea eta Gogorregiko konpartsakidea den Jone Larrazabal Jaietako zuzendari izendatu dutela eta Santutxuko Batzokia kudeatzen duen Asier Lópezek Espazio Publikoa Erabiltzeko Bulegoko zuzendaria dela.

Bilbobus
Bestalde, gogora ekarri nahi ditugu Artxandako funikularraren greba-egunak, Bilbao Kirolaken gaur egungo egoera – igerilekuak itxita daude – eta Bilbobuseko gatazka luzea, izan ere, pribatizazioak eta gobernu-taldearen elkarrizketa-falta lan-gatazka horien atzean daude.

Bilbobuseko grebaren kasuan, funtsezko zerbitzu publiko horren pribatizazioa da zerbitzu horrek azken hogei urteetan jasan dituen lan-gatazka gehienen jatorria.

Gobernu-taldeak herritarrei helarazi nahi die egoera arazo puntual baten ondorio dela, testuinguru global batean prezioak igo direlako, eta ezkutatu nahi du emakida horrek arazoak izan dituela esleipendun guztiekin, TCSArekin, zer esanik ez Veoliaren garaian, eta orain Biobiderekin berriz ere.

Bilbo salbuespena da inguruko hirien artean, zerbitzua pribatizatzen duen bakarra baita. Donostiak, Gasteizek, baita Santanderrek edo Burgosek ere, zuzenean kudeatzen dute zerbitzua, eta Bilbon, berriz, lizitaziora ateratzen da enpresa pribatu batek negozioa egin dezan, nahiz eta 2009an Herri Kontuen Euskal Epaitegiak anomalia horretaz ohartarazi.

Zentzu horretan, Juan Mari Aburto alkateak eta Nora Abete Mugikortasuneko zinegotziak erabaki behar dute arazoaren parte izaten jarraitu nahi duten, enpresarekin lerrokatuz eta langileen aurkako adierazpenak eginez, orain arte egin duten bezala; edo, aitzitik, konponbidearen parte izan nahi duten, %100ean udalarena den eta bitartekorik ez duen hiri-autobus zerbitzu baten alde eginez.

Turistifikazioa
EAJk garatutako ekitaldien eta turistifikazioaren estrategiari dagokionez, politika horien eragina aztertzean, udal-agintariek jarduera ekonomikoaren eragina bakarrik aipatzen dute, eta ez dute aipatzen eragin hori esku gutxi batzuetan kontzentratzen dela, eta ez dituzte kontuan hartzen lotutako kanpo-efektu negatiboak. Urteetan zehar Bilboko Udalak alfonbra gorri bat jarri du gutxi batzuek negozioa egin dezaten, herritar gehienek inpaktu negatiboak jasaten dituzten bitartean.

EAJren kontrolik gabeko turistifikazioaren ondorio negatiboen adibiderik nabarmenena etxebizitza turistikoen ugaritzea da. Etxebizitza horiek bizikidetza-arazoak sortzen dituzte eta etxebizitzaren prezioa garestitzearen eta alokairu faltaren erantzule zuzenak dira.

Hain zuzen ere, maiatzeko osoko bilkuran pisu turistikoak mugatzeko iragarri zen HAPOaren aldaketa partziala agerian uzten du beste alde batera begira egon den gobernu-talde baten kudeaketa txarra. HAPO berria duela bi urte baino ez zen onartu, 2022an, eta orain partxe bat planteatzen dute garai hartan bazegoen eta haren existentzia ukatzen zuten arazo baterako.

Gasteizko Udalean legegintzaldiaren urtea bete ondoren, EH Bilduko udal taldeak herritarren interesak lehenesten jarraitzen du, bere lan politikoaren aurrean. Frogarik nabarmenena da urtarrilean sei milioi euroko aurrekontu-akordioa lortu zuela PSEren eta EAJren gobernuarekin, gizarte-babesa indartzean oinarrituta.

Hauteskundeak guk irabazi ondoren, EAJk eta PSEk guk ez gobernatzeko hitzartu zuten. Beste gehiengo batzuk batzea zilegi eta demokratikoa da. Izan ere, EH Bildutik haiekin egin genuen Marotok eta PPk udalerria ez gobernatzeko, hori eskatzen baitzuen herritarren gehiengoak. Haien interesak gure interesen aurretik jarri genituen. Bederatzi urte pasa dira eta EAJrekin eta PSErekin aurrekontuak adostu ditugu jendearen bizitza hobetzen dutelako.

Hala ere, planteamendu politiko ezberdinen arteko elkarrizketa eta ulermenerako eskua beti zabalik izatea, guztiz bateragarria da oposizioko talde nagusiari dagokion gobernuaren fiskalizazio-lanarekin. Alde horretatik, puntu beltzak izan dira PSEren eta haren bazkidearen kudeaketan.

Gasteiz Antzokiaren kasua adibide argia da. Beste bi urte galdu ditugu gobernuak egoera trabatu duelako. Antxon Belakortu EAko zinegotziak, euskara sustatzeko udal-ekipamendu publiko bat lehen aldiz proposatu zuenetik, hamasei urteko atzerapenak daramatzagu, baina, azkenean, akordio bat lortu dugu. Lazarraga Elkarteari, elkarte kudeatzaileari, egotzitako zorra gobernuaren atzerapenek eragin dute, baina agian, hobe da honelako akordio bat gauzatzea, gure hizkuntzarako erreferente publikorik gabe jarraitzea baino.

Gasteiztarrek EH Bilduko udal taldearen lanean konfiantza dutelaren uste osoarekin lan egiten dutela. Gure lehentasunak hauek dira eta aski ezagunak: eskuinaren murrizketa austeriziden aurrean babes soziala indartzea, etxebizitza eskuratzeko aukerak hobetzea, trantsizio energetikoan aurrera egitea eta tokiko ekonomia eta enplegua sustatzea. Hauteskunde ezberdinetan emaitza onak izan direnez, herritarrek ikusten dute EH Bilduko udal taldeak esaten duena egiten duela, hain zuzen ere gure lehentasuna Gasteizko herritarren interesak direlako.

Aurten, gure herriaren zati batean, Aberri Eguna hauteskundeen kanpainaurrean ospatzen dugu. Euskal Autonomia Erkidegoak apirilaren 21ean egingo dituen hauteskunde autonomikoak aukera paregabea dira ziklo politikoaren aldaketa finkatzeko eta nazio eta gizarte eraikuntzan aurrera egiteko. Datorren legegintzaldiak, lortutako eskubide sozialak sendotzeko eta eskubide berriak lortzeko ez ezik, pultsio nazionala berreskuratuko den legegintzaldia izan behar du.

Ildo horretan, ezinbestekoa da autogobernuaren ponentzia berraktibatzea. Ponentzia horretan, hautestontzietan adierazitako agindu demokratikoari jarraituz eta gizartearen gehiengoaren iritzia errespetatuz, indar politikook gai izan behar gara estatus politiko berriari buruz akordio batera iristeko. Hala ere, gogoratu behar da aurreko legegintzaldian EH Bildu eta EAJ, eta partzialki Elkarrekin Podemosekin, oinarrien inguruan akordio batera iristeko gai izan ginela eta EAJ ez zela gai izan akordioa betetzeko, PSErekin duen aliantzari kosta ahala kosta eusteko bere interes alderdikoiak lehenetsi zituelako.

Nafarroako Foru Komunitatean, Nafarroako Foru Eraentza Berrezarri eta Hobetzeari buruzko Lege Organikoaren (NFEBHLO) erreformak aukera paregabea eskaintzen digu Nafarroa Estatuarekin eta Euskal Herriko gainerako lurraldeekin izan nahi duen harreman mota erabakitzeko gaitasuna duen subjektu politikoa dela aitortzeko. Gainera, funtsezkoa da NFEBHLOren erreforma horrek autogobernua, foraltasuna eta eskubide historikoak blindatzea, Auzitegi Gorenak trafiko eskumenari buruz berriki emandako epaia bezalako eraso birzentralizatzaileak saihesteko.

Iparralden, hirigune elkargoa lorpen handia izan zen. Lehen urratsa. Orain, aitorpen nazionalean eta eskumen-esparruan aurrera egiteko garaia da. Korsikan Autonomia Estatutuarekin irekitako bideak agerian uzten du Frantzia zentralistan ere gainazalaren azpian estaturik gabeko herrien eta nazioen aldeko korrontea poliki-poliki aurrera doala.

Hain zuzen ere, aukera-leiho horiek baliatu behar ditugu orain arte Madrilek eta Parisek karez eta kantuz itxita izan dituzten eztabaidetan aurrera egiteko. Egoera politikoak lurraldetasunari eta nazio aitorpenari buruzko eztabaidan sakontzeko aukera eskaintzen digu. Arduragabekeria litzateke ez aprobetxatzea.

Hori dela eta, berebiziko garrantzia du igande honetan Aberri Eguna ospatzeak. Eusko Alkartasunak, Hegoaldean, Iruñean ospatuko du, Euskal Herria Bilduko gainerako kideekin batera, eta Iparraldean, Uztaritzen, Bagira ekimenak deitutako ekitaldian. Halaber, Eusko Alkartasunak sortu zenetik abertzaleen arteko elkarlanerako espirituari leialak izanik, Aberri Egunaren bezperan, martxoaren 30ean, Euskal Herria Batera plataformak Bilboko Campos Antzokian antolatu duen ekitaldi bateratuan ere parte hartuko dugu.

Euskal Herrian, 2024ko martxoaren 29an.

EFAk (European Free Alliance) Europako alderdia Bruselan burutzen ari den Batzar Orokorrean parte hartuko dugu martxoaren 7an eta 8an. Mozio bat aurkeztu dugu Nekazaritza Politika Bateratuaren (NPB) erreformari buruz eta paisaia kultur ondare ez-material gisa izendatzeko.

Nazioarteko Politikako idazkaria eta EFAko presidentea den Lorena López de Lacalle EAren ordezkaritzaren buru izango da. Ondoan Harreman Instituzionaletako eta Araubide Juridikoko idazkaria den Iker Ruiz de Egino izango du.

Aurkeztutako mozioan euskal nekazariak egun hauetan kaleetan aldarrikatzen ari diren eskaera asko jasotzen ditugu. Ildo horretatik, Europako erakundeei eskatzen diegu beste herrialde batzuetatik inportatzen diren elikagaiei estandar berberak ezartzea, EBko tokiko nekazariekin lehia desleiala saihesteko, elikagaien prezioekin espekulazioa alboratzeko mekanismoak adostea, genero-berdintasuna sustatzeko eta emakumeak eskala txikiko nekazaritza-negozioetan ekintzea bultzatzea, nekazaritza-ustiategiak babestea, herrialdeen elikadura-subiranotasuna bermatzeko modu gisa, eta, azkenik, paisaia Europako herrien kultura-ondare immaterial gisa aitortzea.

Era berean, EFAk Europan feminismoa bultzatzeko martxoaren 8an antolatu duen eztabaida publikoan parte hartuko dugu. Arratsaldean berriz, erakunde feministek, sindikatuek eta Belgikako alderdi politikoek deitu duten genero-berdintasunaren aldeko manifestaziora joango gara.

Itsas Gudari Eguna ospatu dugu gaur Bermeon Alkartasuna Fundazioarekin batera. Lore eskaintzaren ostean egin den ekitaldi politikoan, Rakel Goñi, EA Bizkaiko koordinatzaileak gogorarazi du EAJK hamabost urte daramatzala “Guggenheim museoa Urdaibain inposatzen saiatzen” eta proiektuak ez duela erantzuten Busturialdeak dituen beharrizanei.

Goñik gaitzetsi egin du PSEk Urdaibaiko Biosfera Erreserban museo-egoitza berria jartzeko proiektuarekiko hartu duen papera. “2010ean, Ricardo Bastidak diseinatutako eraikina txikitu nahi zutenean, museoa Urdaibairen babesarekin bateraezina zela esan zuten, eta orain, aldundietan eta Eusko Jaurlaritzan EAJren beharra dutenez postuak banatzeko, PSEk kontrakoa esaten du, beste behin ere, EAJren makulu bihurtuz”, esan du.

Bizkaiak eta Busturialdeak gobernantza-eredu berri, ireki eta parte-hartzailea behar dutela adierazi du, eta horren adibide jarri ditu uraren kudeaketa, Osakidetza eta Gernikako Ospitalea, eta eskualdeko garraio publikoaren egoera.

Apirilaren 21eko hauteskunde autonomikoei dagokienez, EH Bilduren aurkari politikoen kanpaina gogor eta zikina izango dela iragarri du Goñik. “Euskal gizartearen gehiengoa ezkerrekoa eta abertzalea da, eta EH Bildu da bi pultsio hauek uztartzen dituen indar politiko bakarra”, azpimarratu du.

Azkenik, “Israel Palestinan egiten ari den ekintza basatiak” errefusatu ditu, eta 30.000 hildako baino gehiagoren ostean, gehienak emakumeak eta haurrak direla, “Israel Gazan egiten ari denak izen zehatza dauka: garbiketa etnikoa”.

11:00etan, Matxitxako lurmuturrean, Nestor Basterretxearen ‘Matxitxakoko Guda’ eskulturaren inguruan, omenaldia egingo da. Bertan lore eskaintza eta ikurrina igoko dira.

12:15etan, Bermeoko Kafe Antzokian, ekitaldi politikoa egingo da Rakel Goñi Bizkaiko Lurralde koordinatzailearen hitzartzearekin. Ondoren, ‘herrigintzatik naziogintzara’ mahaingurua izango da Nadia Nemeh (Bermeoko alkatea), Idurre Bideguren (Bermeoko alkate ohia eta EH Bilduko senataria) eta Naiara Fernándezen (Bermeoko zinegotzi ohia eta Eusko Legebiltzarrerako EH Bilduren Bizkaiko hautagaia) parte-hartzearekin.

Nerea Gartziak, Nafarroako Eusko Alkartasunaren lurralde koordinatzaileak, salatu duenez, “onartezina da Guardia Zibilaren elkarte bati arrazoia ematea, Konstituzioaren 150. artikulua foru lurraldeen eskubide historikoak aitortzen dituen Lehen Xedapen Gehigarriaren aurretik jarriz”.

“Nafar gehienok etorkizunera begiratu nahi dugun bitartean, epaiak iraganera garamatza. NFEBHLOren garapenean aurrera egin beharrean, Nafarroako autogobernuan atzerapausoa da epai hau”, adierazi du Gartziak.

Lege organiko baten bidez trafikoaren eskumena berreskuratzeko aukerari dagokionez, Auzitegi Gorenaren epaiak iradokitzen duen bezala, Nafarroako EAko koordinatzaileak esan du “orain, Kongresuan gehiengo aurrerakoiarekin posible izango litzateke, baina ezin dugu beste ganbera baten osaeraren eta aritmetika parlamentarioaren mende egon, eta, beraz, trafikoaren eskumena eskubide historikotzat aitortzea aldarrikatzen dugu”.

Azkenik, Gartziak nabarmendu duenez, “gure Foruzaingoak gaitasun osoa du eskumena gauzatzeko, eta ez du Guardia Zibilaren tutoretzapean egon beharrik”. Ildo horretan, Eusko Alkartasunak Nafarroan trafikoaren eskumena berreskuratzeko ekimen eta kudeaketa instituzional guztiak babesten dituela adierazi du.