Eusko Alkartasunak bat egin du urtarrilaren 8an Bilbon “Euskal Presoak Euskal Herrira eskubide guztiekin, Egin dezagun urratsa” lelopean egingo den manifestazio nazionalarekin. EAk, Alternatibak, Ezker Abertzaleak, Aralarrek eta ABk gaur egindako agerraldian Euskal presoen eskubideen defentsa herritar ororen eskubideen defentsa dela argudiatu dute, eta espetxe politikaren amaierak “aro berri baten hasiera” ekarriko duelako esperantza agertu dute. Honoko hau da irakurritako testua:

Euskal jendarteari, dagokionari, egin dezagun urratsa !

Mendeetan auzolana, hizkuntza, duintasuna, konpromisoa, elkartasuna, lana eta sufrimenduaren bitartez landu dugun harria da gure herri txiki hau. Itxaropenaren aroan sartzea desiratzen duen herria da gurea. Bihotzean mina dugu ordea, gure senide, lagun eta herrikide diren euskal preso politikoek pairatzen duten eskubide urraketaren aurrean.

Euskal jendarteak eta nazioarteko hainbat erakundek hamarnaka aldiz deitoratu dute krudelkeria oinarri duen eta sofrikarioa besterik ez dakarren espetxe politika hau. Gure senide, lagun eta herrikide diren euskal presoen eskubideekin nahi erara jolasten dute. Hala juzkatzen dugu frantziar zein espainiar Estatuek aplikatzen duten sakabanaketa politika; gaixotasun larriak dituzten presoak gatibu mantentzea; bizitza osoko espetxe zigorra; 3/4ak beteta dituzten presoak kartzelean mantentzea; isolamendua; bakartzea; aurrez aurreko bisitetan jasan beharreko tratu umiliagarria, elkartasunaren kriminalizazioa eta abar. Zalantzarik gabe, beren beregi eraikitako kartzela sistema ankerrena. Gizabanakoa suntsitu eta euskal jendartea bete-betean kolpatzeko ahalegina. Zitalkeria andana hori ote herri bat justiziazko bakera eraman dezakeen bidea? Euskal Herriaren gehiengo zabalak ezetz dio.

Horregatik, nahikoa da esaten dugu. Euskal Herria aro berri baten atarian dagoela sinisten dugu eta lehen premia larrizkoa izan dena, orain are gehiago; gure senideen zein gure egoeran berehalako aldaketak eragitea ezinbestekoa iruditzen zaigu: Sakabanaketarekin amaitzea, gaixotasun larriak dituztenen kaleratzea, bizi guztiko kartzela zigorra bertan behera geratzea eta espetxe barruan ematen diren hainbat eskubide urraketarekin bukatzea. Orain arte egin dugun gisara, nekatu gabe eta hala egingo den arte, euskal preso politikoak eta euren senideen bizitzak inpunitate osoz egunero erruleta zital eta krudelean ezartzen dituen espetxe politika horrekin amaitu beharra aldarrikatzen dugu. Edozein demokraziaren oinarri oinarrizko beteharrak liratekenak baino ez ditugu eskatzen. Justiziazko eta bakezko aro beharko lukeenari arnasa emango dioten neurriak. Alderantzizkoak, egoera honek alegia, balizko aro berri bati arnasa ukatzen baitio.

Alderdi politiko gisara eta euskal herriko biztanleriaren zati zabal handi baten ordezkari garen heinean, indarrean dagoen espetxe politikaren amaiera irmoki eskatzea gure ardura da.Modu berean, konprometitzen gara espetxe politikaren bukaeraren aldarria lan egiten dugun instituzio eta órgano guztietara eramatera.
Jabe gara indarrean dagoen espetxe politikak sufrimendu itzela sorrarazten diola milaka eta milaka euskal herritarrei. Egoera hori aldatzea desiratzen dugu. Gure konpromiso eta errespetu osoa adierazi nahi diogu baita mendekua eta eskubide urraketa oinarri dituen espetxe politika anker hau pairatzen duten pertsona guztiei.

Guztion esku dagoelako egoera hau aldatzea. Herritar orori dagokigun betebeharra dela uste dugulako. Euskal preso politikoen eskubideen defentsa, herritar ororen eskubideen defentsa ere badelako. Espetxe politika honen amaierak, aro berri baten hasera ekar dezan. Demokrazia nahi dugulako. Nahikoa delako. Herri honek sufrimenduzko eta bidegabekeriazko aro hau atzean utzi eta bere bidean aurrera egin nahi duelako, datorren urtarrilaren 8an, “Euskal Presoak Euskal Herrira eskubide guztiekin, EGIN DEZAGUN URRATSA” lelopean manifestazio nazionala egingo dugu Bilbon.

 

Jatorria: Eusko Alkartasuna